Hjalti Halldórsson

Hjalti Halldórsson er tveggja barna faðir, fæddur árið 1980 og alinn upp í Ártúnsholtinu. Hann  heillaðist snemma af sögum, hvort sem þær birtust í bókum, tónlist, leiklist eða bröndörum og fann það út á hefðbundinni skólagöngu að hann vildi verða sögumaður. Eftir framhaldsnám í mannfræði, sagnræði og kennslufræði hóf hann stöf sem grunnskólakennari og fékk þar ófá tækifæri til að segja sögurnar sínar. Eftir nokkur ár af kennslu og þónokkrar vinsamlegar ábendingar frá nemendum fann hann út að heillavænlegast væri að reyna að koma sögunum í bækur í stað þess að fara með þær upphátt í kennslustundum. Aftur og aftur og aftur.

Það var árið 2017 sem fyrsta bók Hjalta, Af hverju ég? kom út og eru þær orðnar fjölmargar síðan og fjölgar enn. Skapandi umhverfi skólans er endalaus uppspretta hugmynda og hafa bækurnar hlotið frábærar viðtökur lesenda. Sumar þeirra eru innblásnar af Íslendingasögunum enda Hjalti með alvarlegt miðaldablæti. Hann hefur reynt að tappa af útrásinni fyrir það með því að starfrækja hlaðvarpið Ormstungur þar sem hann fer yfir Íslendingasögurnar á mannamáli ásamt því að fá skemmtilega viðmælendur í heimsókn. Eins og það sé ekki nóg hefur hann einnig birst á sjónvarpsskjám landsmanna sem vesældarlegur víkingur í þáttunum Víkingaþrautin í Stundinni okkar. Hann ætti líklega að leita sér aðstoðar…

Hjalti fær reyndar mikla aðstoð við að rækta sköpunarkraftinn í Smiðjuteyminu í Langholtsskóla þar sem hann starfar í dag. Smiðjan fékk Íslensku menntaverðlaunin 2020 fyrir framúrskarandi þróunarverkefni og hefur það markmið að auka veg þverfaglegra viðfangsefna með áherslu á sköpun, lykilhæfni og nýtingu upplýsingatækni í námi. 

Þrjár skemmtilegar staðreyndir um Hjalta eru að hann er haldinn hamlandi fuglafóbíu, hefur unnið skíðagöngukeppni í Noregi og var valinn efnilegasti borðtennismaður Víkings árið 1995. 

Heimasíða Hjalta: www.hjaltihalldorsson.com

FB síðan Bækurnar hans Hjalta 

Smiðjan í Langholtsskóla: www.smidjan.com

Ormstungur: www.ormstungur.is